番薯怎樣過鹹水（準備篇）
抐話頭
你若今點開這篇文，當咧讀這句話，凡勢連鞭就想著兩个問題：
「這篇不是在講吃的喔！？ 」
「寫的是中文，但怎麼哪裡怪怪的...」
無錯，規欉好好！這篇的確毋是咧講煮食，講 ê 其實是申請出國做交換學生（過鹹水）ê 一寡撇步，予有趣味 ê 大學生（番薯）罔參考。恁若看了小可霧嗄嗄，彼是因為這是台語寫成 ê。這篇文就是頭一篇台語 ê 交換申請報你知。
先自我紹介一下，我大學讀 ê 是英語，tsím 當咧師大讀研究所，專攻英語佮華語 ê 翻譯，一路行--來，算常在使用英語學習、做工課。雖罔英語學了十幾冬，未來應該嘛會靠英語趁食，但是我其實從來毋捌去過英語系國家。到今年中才雄雄想著咧欲畢業--矣，應該愛把握最後身為學生 ê 機會，來去過一下仔鹹水。
這改分享文哪會用台語來寫，其實干焦因為一个原因：台語本底就會使用來做任何代誌。我一直相信咱愛會曉用台語來思考萬事萬物。用台語來盤撋，OK；用台語來相罵，OK；用台語來教申請交換 ê 撇步，當然抑是OK。
Tsím 愛來講佮正文相關 ê 代誌。我今年（2019）這擺是申請「台師大校級交換」，揀 ê 語組是「英歐語組」，最後牢我 ê 第一志願 — 荷蘭 ê「萊頓大學」。這篇文主要是按我這改師大 ê 經驗來紹介分享，檢采有一寡部分佮恁學校無仝，就罔參考--looh。
我會按申請準備、自傳按怎寫、面試按怎準備來分做三篇，這篇頭一篇，咱著對申請愛準備啥來講起。
話頭抐一个傷久--矣，來，起鼓！
申請進前愛創啥物？
欲申請交換學生，一定愛做以下兩項誠要緊 ê 代誌：
一、愛參考往過 ê 資料二、愛考外語檢定 （若欲去中國應當就毋免）
兩點雖然看來敢若真簡單，毋過其中嘛是有真濟鋩角愛注意，加上外語檢定 欲準備愛時間，考了等成績出--來又閣一段時間，我會建議上無愛掠半冬 ê 時間來做以上兩點，才袂到時舞這舞彼戇戇踅。較早開始會較扭掠！
咱先來講愛看啥物資料。
欲了解師大 ê 交換學生計畫紹介，會當去國際事務處 ê 網站揣：
師大 ê 交換計畫分做「校級」佮「院系所級」，校級是師大國際事務處這層來主辦，學生會使揀 ê 交換學校上濟，校級申請了後是隔轉年才出國（譬如二年仔申請，就是三年仔出去。）；院系所級是予各院各系來主辦，會當揀 ê 學校較少，毋過會有校級無 ê 學校佮系所，院系所級申請了後是後學期就出國。所以會當先想看覓佗一个較欱你 ê 需求。我這改就是申請校級 ê , 差不多明年8、9月出去。
我咧準備 ê 時陣有參考頂一學期 ê 簡章、別人 ê 交換心得。這佇網站攏揣會著。另外，學期初通常會舉辦交換說明會，若有趣味嘛會使參加。
往過 ê 簡章攏會共申請 ê 標準佮規定寫了清清楚楚，頂一个學期 ê 基本上袂改變傷濟，所以請一定愛開時間看--看-咧。
因為寫了足清楚，我遮簡單提醒幾个重點就好。
第一：一擺申請干焦會使揀一个語組。師大分「中文組」、「英歐語組」、「日韓語組」。申請者咧排志願 ê 時陣袂使迒組揀學校。你無法度揀中國 ê 閣揀英國 ê 學校，因為這兩 ê 國家佇無仝組，愛記咧干焦會當選一組--喔。
第二：上無愛上一學期 ê 課。申請 ê 是愛交成績單仔予學校，所以上緊愛一年仔後學期才會使申請。
第三：成績愛符合對方學校 ê 要求。誠濟外國學校會要求申請 ê 學生有一定 ê 成績。提我這改申請 ê 萊頓來講，In 要求師大學生上無愛有3.2/4 ê GPA（師大其實是用4.12 ê 制度，愛算3.296/4.12）,所以家己平常嘛愛顧家己 ê 上課分數，毋通到時分數無到理想學校 ê 標準，就欲哭無目屎--looh。
資料講完--矣，再來講考外語檢定。
若毋是中文組 ê 學校，基本上攏會愛你提供外語檢定 ê 成績，這應該是誠濟人咧準備申請拄著上大 ê 難關，嘛是我頭前建議愛提早半冬開始準備 ê 原因。無仝語言 ê 考試時間攏無仝，基本上我知影 ê 是英語（TOEFL 抑是 IELTS）上濟，差不多逐個月攏有一場以上，若是日語、韓語、西班牙語等等極加一冬才兩擺。欲申請著愛共考試時辰記予牢--喔。
若佮我仝款欲申請英語系 ê 學校，就有TOEFL 、IELTS兩種選擇。兩種攏會考聽說讀寫，上大 ê 差別就是：TOEFL是用電腦考試，連講話嘛是對電腦錄音； IELTS咧報名時會使揀欲用紙本 ê 考卷抑是電腦，考對話著一定愛面對真人考官。兩種攏有好有䆀，我家己是有法度對機器順順 ê 講話，而且TOEFL有較俗一寡，最後就選TOEFL。紲--來我著來紹介我按怎準備。
我其實是頭一擺考TOEFL，7月中 ê 時陣確定報名 ，考試時間是10/19，所以我大約有三個月通準備。成績公佈是 10/29，成績單寄到厝 11/26。所以考試到提著單愛一個偌月，所以真正愛提早報名，無到時超過交外語成績 ê 期限就䆀--矣。我無補習，干焦家己揣資源，寫線頂 ê 試卷，閣有佮人請教口說 ê 準備方式，算全部自修，最後有破百 ê 成績。
遮我愛先踏一个話頭，我一直以來攏有慣勢咧接觸英語，Tsím 嘛咧讀英語相關 ê 研究所，我小可知影鋩鋩角角才選家己讀。若是你平常無咧使用英語，這暫仔才欲衝一下，按呢就愛認真思量家己敢有法度。補習雖然愛加開錢，但是會使幫助你衝懸成績，嘛是會使好好參考看覓，得失錢總比得失機會好。
我準備時有先上PTT ê TOEFL板參考別人 ê 自修經驗，嘛有看其他 ê 論壇佮網站，若確定欲自修，加看覓前輩 ê 經驗，才袂踏毋著步。我彼勢定定用一个中國 ê 網站，叫做「考滿分」，這是一个有夠好用 ê 資源，我揣著 ê 時真正暢佮欲害。這个網站有目前全部 ê TOEFL TPO（就是官方出了無欲用 ê 題目，但是做練習誠好），寫題目 ê 系統佮真正考試足成，無啥精差，誠好來熟似規个考試 ê 模式。上重要 ê 是，伊完全免費。FREE。真正是一个 i-tsi-pang ê 練習資源。
我佇準備 ê 一開始有先用考滿分揀一份完整 ê 試卷考看覓，了後就針對家己 較漚 ê 部分加強。譬如我咧讀科技相關 ê 文章誠慢，毋著 ê 題目嘛較濟，我就會加去看英文科技新聞、聽科技類 ê 節目等等。你若拄開始準備，進前 ê 話，我會建議先做一回測家己 ê 實力，通知影佗愛加練習。
頭兩個月我大部份攏咧加強讀 ê 能力，因為這兩項較需要時間來培養。最後一個月就閣加入講、寫 ê 練習。
江湖一點訣，講破無值錢。論真，我自修 ê 撇步無他，總一句：
逐工聽、逐工看，逐工使用英語。紲來推一寡我準備是用 ê 資源，其實到今我嘛是常在用--喔。
練聽力：（我大部份用podcast，平常行路嘛會使聽。）
— 以上三个會使練英國腔 —
Crash Course （這个是YouTube 頻道）
— 以上四个會使練美國腔 —
練閱讀：
The New York Times （這个愛月費，毋過逐個月攏有五篇免費通看。）
事先 ê 準備咱就講到遮，寫甲躼躼長，記咧三項物件就好：申請進前 ê 準備時間愛掠較閬 ê，才好參考往過 ê 資料、考外語檢定。
後一篇會來講足濟人嘛捎無摠 ê ：自傳按怎寫才著--咧？
