申請期間愛創啥物？
一、材料準備
開始欲攢資料進前，我會建議逐家先揣一个空 ê 資料鋏仔，好來貯愛交 ê 書面資料。我是選用縛線 ê，下底有特別加大 ê 彼種，因為到時全部資料囥做伙是不止仔厚，這款較勇。紲來，提一張單仔共愛攢 ê 資料攏總寫--落-來，若攢好一項，就會使共彼項撇掉，按呢就免煩惱有物件落勾。
另外閣會使先買起來囥 ê 有：
牛皮批囊（4份，A3上拄好）文件夾（4份）文件桿（4枝）
師大要求資料愛裝訂好勢，最後裝入去牛皮批囊才準算。以上材料就是欲裝訂資料用 ê ，當然恁若跤手緊、有閒工，嘛會使提去影印店倩 in 裝，我當初是家己買遮 ê物件來創。師大規定是，資料愛正本一份+影本三份，總共四份，所以裝訂材料攏愛四份。
遮 ê 物件建議是攏先攢好，莫到時欲訂做伙才來買。若是萬不一，你到最後一工才共所有資料攢好勢，就會當直接裝訂，免閣雄雄狂狂走去文具店買，加了寶貴 ê 時間。我就是最後一工才咧印資料、裝訂，文具店走入走出幾若擺，佳哉是學校邊就有一間，無，凡勢就袂赴準時交--出-去。
其實裝訂無規定愛啥款，毋過做成若像一本冊，看--起-來較整齊，掀--起-來嘛較好勢，所以我決定用文件夾佮文件桿，共資料鋏做伙。這兩項踮文具店有 ê 是合咧賣，有 ê 無鬥做伙，恁咧買 ê 時陣著注意--咧。
二、線頂報名
這馬咱著來講報名 ê 流程。師大 ê 報名分做兩層 — 線頂報名佮交書面資料，兩項工課攏愛做了才算申請成功。先來介紹線頂報名：
點入去系統了會愛你先寫基本資料，像讀佗一系、欲報佗一組、外語檢定考偌濟、經驗、興趣等等，這攏算簡單。寫了以後著愛來排志願，遮愛注意一點，師大佇申請期間攏閣有咧佮新 ê 外國學校參詳，所以可能會一直有新 ê 學校噗--出-來通選，恁會使定定去看簡章敢有update，出現新 ê、袂䆀 ê 學校嘛會使參考。愛注意，到最後申請凡勢攏閣會添新 ê 學校，若是恁共志願交--出-去才發現有新 ê，嘛免緊張免驚惶，著直接去國際事務處共 in 投，問 in 到底咧變啥 báng …
Uê！毋是--lah，講耍笑爾爾，是去共志願重排排--咧，就無問題--矣！
線頂資料攏寫齊了後，就會當共繳費單掠--落-來印，報名費納了，收據愛留一份家己收好，毋通 phàng--去，因為確定牢學校了後閣愛交5000箍 ê 保証金，落尾轉--來台灣以後，愛有彼張收據證明，才提 ê 著保証金。逐家佇交換 ê 期間著千萬愛共收據收予好，假使拍無--去，仙拜托就無法共錢提--轉-來--honnh！
三、書面資料
線頂報名講了，閣來是書面資料。愛準備 ê 物件較濟，逐家一定愛再三檢查，總共有：
申請書 （正本1份+影本3份）※愛系/所主任簽名喔！中文成績單（4份）參加活動 ê 證明、證書（4份） 繳費收據（正本1份）外語證書影本（4份）中文自傳（4份）*建議愛攢英文自傳（4份）
頭五項攏誠簡單創，印了就會使囥入資料鋏仔收好。愛特別注意申請書愛系/所主任簽名，無是袂過 ê--喔。我咧交資料時就聽著邊仔一个 tsa̋u 囡仔雄雄喝一聲：「害！愛主任簽名--喔！？」彼陣離到期干焦偆半點鐘，伊有揣著主任無，我就毋知--矣。這款代誌一定會使提早做，若最後減這項，全部煞攏做白工，就真正僥倖--looh！
中文自傳等下就會講著，所以我遮想欲來講建議愛攢 ê 英文自傳。雖罔簡章無寫需要用英文寫，總--是，欲申請「英歐語組」曷是有一份英語 ê 較有一个款。其實英語 ê 會使直接按對中文自傳翻--過-來做英語，甚至會使寫重點就好，我家己就是按呢處理。
自傳欲按怎寫？
「硬體」 ê 物件總算講煞--矣，紲--來講「軟體」，寫自傳 ê 到底有佗一寡重點--咧？Tsím 著予我來小可分拆--咧。
毋過，網路頂走傱久--矣，我嘛是知影「pics or it didn’t happen!」（無圖無真相！）這款江湖規矩，先共成績證明貼--出-來，曷無，人會講我咧膨風，有啥資格來教--人。
這改交換申請，我佇「英歐語組」內排第二，書面佮口試差不都攏是上懸 ê 分數，我自我開拆，應當是我所寫 ê 、做 ê 、選擇 ê ，攏有合評審老師 ê 心意，就是有合評分標準。成績公佈了後，我佇網路頂看著誠濟「我問天」式 ê 問題，濟濟人咧問：
為啥我寫甲遮認真，分數竟然遐低？
TOEFL/ILETS敢一定愛考足懸，分數遮會懸？
到底書面/自傳評分 ê 標準是啥！？
遮 ê 問題問了好，嘛無好。好 ê 點是，這正正是真濟人捎無摠 ê 所在；無好 ê 點是因為：答案早就佇簡章內底--矣。毋信？我只好講：
小弟無咧練痟話，
簡章若有看詳細，
免我踮遮講規 mê，
申請絕對無問題。
是--tih，不才我毋驚見笑，閣特別寫一段七字仔四句連，來強調看簡章有偌重要。論真，就親像考試愛看題目，準備申請、寫自傳應當嘛愛看人要求啥物，我感覺這層道理誠非常簡單、重要。咱這馬著來看這簡章 ê 標準是啥：
咱看--著，「書面審查」是「申請動機」佮「學習計畫」佔上濟比例，意思就是愛你用上濟氣力寫這兩項。申請動機足重要，因為教授無希望你是凊凊彩彩著欲出國，是有足清楚 ê 理路、動機，思考齊勻才做決定。學習計畫愈重要，佔到35%，教授想欲看著 ê 就是你有完整 ê 計畫無，敢有想著欲選啥課？佇交換時期欲創啥？轉--來台灣以後有啥拍算？欲按怎善用交換 ê 經驗？若是遮 ê 問題攏有想過，寫--出-來 ê 一定袂䆀到tueh。
賰 ê 「學業表現」、「其他表現」就是GPA佮你課外活動經驗。這兩項嘛毋是講較硬篤歹創，只是申請期間應該是無法度閣改變啥，著順順仔寫--過就好。所以，咱這馬閣來看拄才頭兩个問題：
為啥我寫甲遮認真，分數竟然遐低？
我想，逐家攏足認真，是按怎著愛你分數懸？若逐家攏認真咧寫自傳，老師欲評分，就是看 siáng 動機特別、強烈；看 siáng 計畫完整、有理；看 siáng 經驗豐富、有才情，真正是適合代表師大出去交流 ê 人才。簡單講：In 就是欲揀出上特別 ê 人。咧寫自傳 ê 時陣著愛盡量表現家己 ê 特點。
TOEFL/ILETS敢一定愛考足懸，分數遮會懸？
閣共書面審查就知，外語檢定根本無算佇評分標準內底，唯一有講著語言能力 ê 是面試是 ê 佔分（40%），所以考了懸抑低，只是你申請某麼學校 ê 標準爾爾，懸袂加分、低袂減分，極加就是你考了懸，分數較好看，教授凡勢較期待你面試 ê 表現（哪會聽--去-來無啥好--honnh？）。就算檢定考了無蓋懸嘛免煩惱，準若好好準備，猶是會當講出教授中意 ê 答案！
若共寫自傳撇步整理理 ê ，就是兩句：
一、確定評分標準二、展現家己 ê 特點
Kōo 寫頂懸遐 ê 可能閣無夠清楚，恁凡勢閣是規頭殼攏咧想「愛按怎分段」、「愛寫啥物內容」這款問題。我著提供一屑屑仔我寫 ê 物件做例。
我咧寫 ê 時陣有較囉嗦淡薄仔，敢若咧設計小說，共我 ê 背景、個性攏有小可交代。毋過我 ê 「申請動機」、「學習計畫」、「其他表現」攏寫了誠清楚，嘛有加英語 ê 重點自傳，基本上有符合評分標準。
有符合評分標準，曷寫了啥物才會予評審佮意？我踮遮愛閣強調一擺，每一个人 ê 動機攏無仝。請恁愛好好思考家己是為著啥物出去交換，家己佮別人比，是佗一點佮人無仝，是專屬於你 ê 特點。 共這點認真寫--出-來，才會得著教授 ê 注意。毋過有一个點會使共恁建議，動機佮計畫攏照第一志願寫，按呢較簡單，嘛較好掌握自傳 ê 完整。
我 ê 動機佮人就是足無仝，可能恁嘛臆 ê 著，就是台語。我對台語誠有熱情、有感情，所以我想欲去國外交流語言保存 ê 經驗，閣有看國外 ê 語言學會使提供啥物無仝 ê 想法。我這个動機迵過全文，所有 ê 部分攏是佮台語、學習語言相關，我嘛舉誠濟過去佮台語運動 ê 經驗做例，加深我足要意台語 ê 印象。我就是會使代表師大，用台語去國外交流 ê 人。
這是我 ê 動機佮自傳精神，這馬著我問你，曷你 ê 特點是啥物？
若有好好思考這層問題，寫--出-來 ê 文章就較有你 ê 精神、靈魂，就是你 ê 一部分。欲按怎展現一部分，就看你--looh！
紲--來講學習計畫，其實這个計畫佮你 ê 動機應該愛敆甲峇峇峇，兩个愛有足懸 ê 關聯，才袂予人感覺你自傳頭前後壁對袂--起-來。學習計畫嘛建議專寫你 ê 第一志願，你會使分做近程、中程、遠程來寫。通常近程是交換前，中程是交換中，遠程是轉--來了後。你會使想，佇各階段欲加強啥物能力、做啥物交流等等，這嘛是空氣在人結，就留予恁想--矣！最後提醒，寫了欲裝訂進前閣愛總ㄧ改檢查，避免有資料落--去。
自傳總算講煞--矣！希望這款分享會當幫著有需要 ê 有志，抑是咧學台語 ê 台語人，逐家攏會使踮這篇躼躼長 ê 文章中揣著需要 ê 物件。毋過，這 ê 系列猶欲結束--喔！紲--來是嘛誠要緊 ê ：
面試按怎準備較好？
